EGO Azkoitian arituko da berriz ere, euskal formazioarentzat erronka handia izango den egitarau batekin. Izan ere, estilo aldetik moldakortasun handia eskatzen die musikariei.

Coplanden handitasunetik abiatuta, Schuberten malenkoliaraino; Straussen gazte-freskotasunetik eta, lehen aldiz entzungo den, Esnaolaren intentsitatetik igaroz.

Gauzak honela, Coplanden obra esanguratsuenetakoa den Fanfare for the Common Man obrarekin abiatuko da kontzertua. 1942. urtean sortua, obra hau herriaren nazio-izpiritua piztea helburu zuten fanfarreen parte izan zen. Coplandek “gizon arruntari” eskaini zion, herritarrak egiten ari ziren borroka eta sakrifizioa omentzeko asmoz.

Ondoren, Richard Straussen Haizezko instrumentuentzako serenata entzungo dugu, alemaniar konpositorearen obra goiztiar bat. 17 urte zituenean sortua, orkestrazioa guztiz menperatzen du, eta Mozarten influentzia argia antzematen da. Obra dotorea eta orekatua da, eta beranduago bere ezaugarri izango den maisutasun timbrikoa erakusten du.

Gero, Jon Esnaola konpositore gaztearen LUUR obraren erabateko estreinaldia interpretatuko du EGOk, Nestor Basterretxearen omenez idatzia. Hitz hauekin deskribatzen du Esnaolak bere obra:

“Obra hau lurraren inguruko erritual bat dela esan genezake. Hala ere, ez da planetari buruz ari, baizik eta zapaltzen, dantzatzen, lantzen eta deuseztatzen dugun lurrari buruz. Hau dela eta, sonoritatea iluna, goibela eta ezkorra da.”

Azkenik, Schuberten Sinfonia amaigabeak emango dio amaiera egitarauari; errepertorio sinfonikoko obra hunkigarrienetako eta misteriotsuenetako bat da. Bi mugimendu soilik izanik, malenkolia eta lirismo sakona adierazten ditu. Hala ere, amaigabea izanik ere, amaitua dirudi intentsitate emozionalari dagokionez.

Ez galdu!